Det er med stor gleda me har motteke meldinga om at Regjeringa i dag har gjeve konsesjon til utbygging av Jordalselva. Etter årtier med kamp frå Jordølene si side, vert flagget heist til topps.

 

Det overordna målet, både for innbyggjarane i Jordalen og for Voss kommune, har vore å få på plass ein sikker veg til Jordalen. Det vart tidleg klart at Voss kommune åleine ikkje ville makte å få dette til. Løysinga som etter kvart såg dagens ljos var å byggja ut Jordalselva og samtidig laga veg til Jordalen. Det er dette prosjektet som i dag har fått konsesjon.

 

Det vil bli nok av høve til å gratulere og takka dei som har gjort ein stor jobb, men dagen i dag høver også til å minna om kven som har vore dei sentrale aktørane. Frå Voss kommune går det difor ein stor takk til bygdefolket i Jordalen. Dei har stått på og vore tolmodige. I dag har dei fått løn for strevet. Så har Holmen kraft, med Arnstein og Sigmund Bjørke i spissen, vore pådrivar for å få realisert prosjektet. Utan deira innsats og klokketru på prosjektet, så hadde me heller ikkje kunna feira i dag. Så er det på sin plass også å nemna det lokalpolitiske miljøet. På Voss har ein vore samstemt, på tvers av partigrenser, at dette prosjektet ønskjer me velkomen. Utan eit sterkt politisk engasjement over mange år, ville nok framtida for Jordalen ha sett annleis ut.

 

Vegen fram til vedtaket om å gje konsesjon til utbygging i Jordalselva kan truleg samanliknast med slik vegen til Jordalen er i dag. Den er smal, kronglete, rasutsett og med mørke låge tunnelar. Rett og slett ei utfordring for alle vegfarande. Slik har også vegen fram til konsesjonsvedtak vore. No veit me at dette er historie. Det går mot ein heilt ny kvardag for Jordalen.

 

Til lukke med dagen!

 

Helsing Hans Erik Ringkjøb

Ordførar Voss Kommune

---