Brua i overbygget oppgradert til 8 t akseltrykk 24.05.12

 

Voss kommune har endeleg fått rapporten frå Cowi, som har etterrekna brua i rasoverbygget i Gjelet. Rapporten viser at brua, slik den står no, har kapasitet til bruksklasse BKt8, også kalla "tung 8". For å opna for 8 tonn akseltrykk var det ein føresetnad at landkara var slik teikningane til brua viste. Dette er no vorte stadfesta.

 

Tungtrafikk kan no sleppast forbi rasoverbygget igjen, men ikkje med fulle lass. For mjølkebilen tyder det at alt vert som vanleg, i allefall på sommarføre, men for dyretransportar og kraftforbilane vert det mykje ekstra køyring. Øyvind Grønhaug, som køyrer kraftfor i bulk, seier i kveld at det vert jo ein del ekstraarbeid, men me får gjera det beste ut av det!

 

Driftsingeniør Jostein Vandaskog i Voss Kommune seier at eventuelle tiltak for å rusta brua opp til BK 10 tonn vil verta svært omfattande og kostbart, og at kommunen ikkje ser det føremålstenleg å gjera slike investeringar no som det vert arbeidd for ny vegløysing til Jordalen.

 

Jostein Vandaskog, til høgre, i samtale med nokre av brukarane av vegen i samband med ei synfaring i april 2012.